Óttast var um afdrif þriggja rjúpnaskytta

Óttast var um afdrif þriggja rjúpnaskytta í jafn mörgum landsfjórðungum í gær og voru björgunarsveitir kallaðar út í öllum tilvikunum. Ein skyttan fannst ekki fyrr en klukkan tíu í gærkvöldi í Bitrufirði. Hinar fundust fyrr, önnur í Víðidal og hin kom fram á Lyngdalsheiði. Allar voru skytturnar heilar á húfi en ekki fara sögur af veiðiskap þeirra.

Rjúpnaveiðitímabilið hófst í gær og eftir því sem NFS kemst næst var veiðin þokkalega góð þar sem á annað borð viðraði til veiða.