Ljósmyndasýning frá leiðtogafundi

Ljósmyndasýningin ,,Leiðtogafundurinn í Reykjavík 1986" verður opnuð almenningi, í Tjarnarsal Ráðhúss Reykjavíkur, á miðvikudag klukkan fimm. Myndirnar á sýningunni eru 42 að tölu flestar teknar af ljósmyndurum Morgunblaðsins og DV, sem voru tvö stærstu dagblöðin á þeim tíma.

Í fyrsta sinn verða sýndar ljósmyndir frá Rússlandi, af þessum atburði. Annars vegar er um að ræða myndir frá Itar-Tass fréttastofunni og hins vegar frá Yuri A. Lizunov einkaljósmyndara Gorbachevs sem nú er háaldraður maður í Moskvu.

Síðarnefndu myndirnar hafa ekki áður komið fyrir sjónir manna því þær voru sérstaklega framkallaðar fyrir ljósmyndasýninguna. Einnig eru myndir frá ljósmyndurum Hvíta hússins sem Ronald Reagan safnið hefur lánað.