Orka virkjana í Skagafirði einungis nýtt innan héraðs

Baráttusamtök hafa verið stofnuð í Skagafirði gegn virkjun fallvatna héraðsins. Hugmyndir sveitarstjórnar Skagafjarðar eru háðar því skilyrði að orkan verði einungis nýtt innan héraðs, samkvæmt sérstakri bókun. Í henni segir að það sé samfélagsleg skylda að meta alla möguleika til eflingar atvinnu- og mannlífs í Skagafirði.

Ákvörðun meirihluta sveitarstjórnar Skagafjarðar síðastliðinn fimmtudag að setja tvær virkjanir, Villinganesvirkjun og Skatastaðavirkjun, inn á aðalskipulagstillögu, hefur þegar leitt til þess að samtök hafa nú verið stofnuð gegn slíkum hugmyndum. Í tilkynnigu sem barst í gær frá nýstofnuðum áhugahópi um verndun Jökulsánna í Skagafirði, segir að markmið hópsins sé að vernda árnar og að þegar í stað verði horfið frá öllum hugmyndum um virkjun þeirra. Gunnar Bragi Sveinsson, oddviti framsóknarmanna og formaður byggðaráðs, segir það vaka fyrir meirihlutanum að gefa íbúum færi á að kynna sér málið og taka afstöðu, og það sé höfuðatriði að orkan verði ekki flutt úr héraði. Hann vekur athygli á sérstakri bókun sem fylgdi samþykktinni en þar segir að mjög ólíklegt sé að virkjanir við Villinganes eða Skatastaði verði á dagskrá næstu árin þar sem ljóst sé að iðjuver á Norðurlandi verður reist við Húsavík. Það sé samt samfélagsleg skylda að meta alla möguleika til eflingar atvinnu- og mannlífs í Skagafirði. Virkjanir í Héraðsvötnum komi aðeins til greina að undangengnum víðtækum rannsóknum og almennri upplýstri umræðu um kosti og galla, þar sem m.a. verði leitað álits íbúa Skagafjarðar. Er ítrekað að mögulegir virkjunarréttir verði í höndum Skagfirðinga og einungis nýttir til eflingar atvinnu og mannlífs innan héraðs.