Má teljast heppinn að ekki fór verr

Brúarsmiður má teljast heppinn að ekki fór verr þegar átta tonn af steypustyrktarjárni féllu á hann á mótum Suðurlands- og Vesturlandsvegar á tíunda tímanum í morgun, þar sem vinna stendur yfir við gerð mislægra gatnamóta. Maðurinn festist undir járnhrúgunni og tók það slökkviliðsmenn hátt í 45 mínútur að ná brakinu af honum. Að sögn vakthafandi læknis á Landspítalanum þykir mildi að maðurinn hafi ekki slasast meira en raun ber vitni en hann fór í aðgerð síðdegis vegna handleggsbrots. Auk þess meiddist hann lítillega á fæti og öxl.