Hjartans mál

Hjartalæknar ganga af samningi við Tryggingastofnun frá og með morgundeginum. Við tekur valfrjálst tilvísanakerfi þar sem sjúklingar þurfa beiðni frá heimilislækni til þess að fá hjartalæknisheimsókn endurgreidda frá Tryggingastofnun.

Hjartalæknar sögðu sig af samningi við Tryggingastofnun fyrsta janúar og uppsögnin tekur gildi á morgun. Þá munu sjúklingar þurfa að greiða fullt gjald við komu til hjartalæknis og sækja síðan endurgreiðslu til Tryggingastofnunar.

Siv Friðleifsdóttir heilbrigðisráðherra segist ekki eiga von á því að nýja fyrirkomulagið muni breyta miklu fyrir sjúklinga, hvorki hvað varðar kostnað né biðtíma. Þá telur hún líklegt að heilsugæslulæknar geti framvegis sinnt þeim sem einungis þurfa einfalda skoðun án þess að þeir þurfi að leita til sérfræðings.

Þórarinn Guðnason, formaður Félags sjálfstætt starfandi hjartalækna, segir hjartalækna ekki lengur vilja vera milliliðir milli Tryggingastofnunar og sjúklinga. Einingakvóti hjartalækna kláraðist í lok október og því fengu þeir ekkert endurgreitt frá Tryggingastofnun í nóvember og desember. Því vilja þeir nú ekki lengur að greiðslur Tryggingastofnunar fari í gegnum þá heldur að niðurgreiðsla Tryggingastofnunar fari beint til sjúklinga.