Fundurinn fyrsta skrefið

Fundi viðræðunefnda Bandaríkjamanna og Íslendinga um framtíð varnarsamstarfs ríkjanna lauk í utanríkisráðuneytinu á þriðja tímanum í dag. Fulltrúi Bandaríska utanríkisráðuneytisins sagði eftir fundinn að hann hefði aðeins verið fyrsta skrefið í löngu ferli. Frekari viðræður væru fyrirhugaðar í Bandaríkjunum og á Íslandi næstu vikur og mánuði.

Helstu fulltrúar bandarísku viðræðunefndarinnar svöruðu spurningum fjölmiðlamanna eftir fundinn. Fyrst til svara var Carol van Voorst, sendiherra Bandaríkjanna á Íslandi, en hún leiðir viðræðurnar fyrir hönd Bandaríkjamanna.

Hún sagði viðræðurnar í dag hafa verið uppbyggilegar og árangursríkar. Þær sýndu vilja beggja ríkja til að styrkja samband sitt og samvinnu í öryggismálum til þess að þau geti svarað ógnum nútímans.

Auk sendiherrans voru til svara þeir Mark A. Pekala, fulltrúi bandaríska utanríkisráðuneytisins, og James Townsend, fulltrúi varnarmálaráðuneytisins.

Mark Pekala sagði margt eftir í viðræðunum og frekari fundir fyrirhugaðir.

Aðspurður sagði hann þegar liggja fyrir áætlun um fyrirkomulag varna Íslands af hálfu Bandaríkjamanna. Hún feli í sér notkun hvaða tækja og tóla sem herinn hafi til umráða hvar sem er í heiminum.

Hann sagði að á fundinum í dag hefði meðal annars verið rætt um hernaðarmátt Bandaríkjamanna um allan heim og getu æðstu stjórnenda hans til að færa hvaða tæki og tól sem er hvert sem er í heiminum þar sem þeirra reynist þörf.

Hann bætti því við að Bandaríkjamenn hefðu allta haft áætlanir upp um fyrirkomulag varna bandamanna sinna.