Slökkvistarf gengur erfiðlega í Borgarfirði

Slökkviliðsstjórinn í Borgarnesi býst við að slökkvistarf vegna sinueldanna á Mýrum í Borgarfilrði muni standa alla helgina en bætt hefur í eldinn í morgun, eftir að hann virtist vera í rénun í nótt. Að sögn Bjarna Þorsteinssonar, slökkviliðsstjóra snýst baráttan við sinueldanna upp á líf og dauða. Hann segir slökkvistarf aðallega beinast að því að bleyta í kringum nærliggjandi bæi til að reyna að bjarga þeim og búfénaði.

Allt tiltækt slökkvilið frá Borgarnesi, akranesi og Búðardal hefur verið kallað út til að reyna að ráða niðurlögum sinubrunasns og hefur verið kallað eftir aðstoð frá Slökkviliði Reykjavíkur og þyrla frá þyrluþjónustunni dreifir sandi yfir svæðið. Bændur frá nærliggjandi sveitum hafa komið á traktorum og dreift mykju og hlandfor á eldinn. Unnsteinn S. Jóhannsson er bóndi í Laxárholti. Hann líkir ástandinu við baráttu Davíðs við Golíat og segir að eins og staðan er nú sé Golíat með yfirhöndina. Hann hefur verið að síðan klukkan tíu í morgun og hefur ekki einu sinni tekið sér kaffistopp enda liggi mikið við. Hann notast við haugdælu til að dreifa skít og hlandfor til að stoppa eldinn og gengur það betur að hans sögn heldur en að sprauta vatni þar sem mikill þurrkur er og vatnið gufar því fljótt upp.