Áfellisdómur yfir stjórnsýslu Póst- og fjarskiptastofnunar

Áfellisdómur yfir stjórnsýslu Póst- og fjarskiptastofnunar

Úrskurðarnefnd um fjarskipta- og póstmál hefur úrskurðað í ágreiningsmáli Símans og Póst- og fjarskiptastofnunar vegna rekstrargjalds sem stofnunin lagði á Símann. Úrskurðarnefndin komst að þeirri niðurstöðu að Póst- og fjarskiptastofnun hefði brotið gegn jafnræðisreglu Stjórnarskrár Íslands, helstu meginreglum stjórnsýslulaga og lögum sem gilda um Póst- og fjarskiptastofnun.

Af niðurstöðum málsins er einnig ljóst að Póst- og fjarskiptastofnun hefur oftekið rekstrargjald af Símanum sem gæti numið tugum milljónum króna. Síminn mun krefjast endurgreiðslu hinna ofteknu gjalda.

Fjarskiptafyrirtæki skulu árlega greiða Póst- og fjarskiptastofnun rekstrargjald sem nemur 0,20% af bókfærðri veltu af fjarskiptastarfsemi. Ágreiningurinn á milli Símans og Póst- og fjarskiptastofnunar stóð aðallega um hvort telja skuli svokallaða innri veltu sem hluta af bókfærðri veltu félagsins.

Póst- og fjarskiptastofnun taldi innri veltu með í rekstrargjaldsstofni og hækkaði þar með stofninn sem því nemur. Innri velta er reiknuð velta af viðskiptum milli deilda félagsins sem Síminn hf. færir í bókhaldi til þess að aðskilja bókhald einstakra starfssviða félagsins.

Staðið var að álagningu rekstrargjalds með mismunandi hætti gagnvart Símanum hf. og gagnvart keppinautum félagsins, svo sem Dagsbrún. Slíkt samræmist ekki jafnræðisreglu Stjórnarskrárinnar, og stjórnsýslulaga auk þess að fara gegn lögum um Póst- og fjarskiptastofnun.

Úrskurðarnefndin taldi PFS jafnframt hafa brotið egn helstu meginreglum stjórnsýslulaga, þ.e. rannsóknarreglu, leiðbeiningarskyldu og málshraðareglu.

Síminn kærði ákvörðun Póst- og fjarskiptastofnunar í janúar síðastliðnum vegna rekstrargjalds sem stofnunin lagði á Símann fyrir árið 2004. Samkvæmt úrskurðinum skal Póst- og fjarskiptastofnun svo fljótt sem auðið er leggja að nýju rekstrargjald á Símann hf. í samræmi við fyrirmæli Úrskurðarnefndarinnar.

Þetta er í annað skipti með stuttu millibili sem Úrskurðarnefnd finnur að stjórnsýslu Póst og fjarskiptastofnunar, sjá vef Póst – fjarskiptastofnunar: