Ráðherrar neita ábyrgð

Hvorki heilbrigðisráðherra né fjármálaráðherra segjast bera ábyrgð á kjarasamningum við starfsfólk á hjúkrunarheimilum, sem fór í setuverkfall í gær. Jóhanna Sigurðardóttir, þingmaður Samfylkingarinnar, sagði á Alþingi í morgun að fjármálaráðherra gæti ekki hlaupist undan ábyrgð í þessu máli.

Níu hundruð starfsmenn á dvalarheimilum aldraðra fóru í setuverkfall í gærdag og fengu hundruð íbúa á þessum heimilum ekki fulla þjónustu vegna þessa. Ásta Ragnheiður Jóhannesdóttir, þingmaður samfylkingarinnar hvatti sér hljóðs um dagskrá þingsins í upphafi þingfundar í morgun, til að ræða kjör ófaglærðs starfsfólks á hjúkrunar- og dvalarheimilum aldraðra. Hún krafði heilbrigðis- og fjármálaráðherra um svör. Ásta Ragnheiður sagði dýrt að borga svo lág laun því sífellt þyrfti að ráða nýtt fólk. Hún sagði þó nokkuð af rúmum standa auð vegna manneklu og það væri óásættanlegt á meðan 350 aldraðir biðu eftir plássi.

Fjármálaráðherra svaraði því til að kjarasamningar við umrædda starfsmenn væru ekki á ábyrgð fjármálaráðherra, þetta væru starfsmenn einkafyrirtækja sem hefðu gert samning við ríkið. Hann sagði málið frekar heyra til heilbrigðisráðuneytisins.

Jóhanna Sigurðardóttir, þingmaður Samfylkingar, sagði fjármálaráðherra ekki geta afsalað sér ábyrgð því dvalarheimilin væru rekin af ríkinu með þjónustusamningum. Hún kallaði það kaldar kveðjur til starfsfólks dvalarheimilanna ef fjármálaráðherra segðist ekkert ætla að gera í málinu.

Siv Friðleifsdóttir, heilbrigðisráðherra, skildi ekki í því að málinu væri vísað til hennar, því heilbrigðisráðuneytið færi ekki með samningsvald í þessu landi. Hún sagði ekki á sinni ábyrgð að semja við þetta fólk.

Ágúst Ólafur Ágústsson, varaformaður Samfylkingarinnar, sagði rót vandans vera úrelt daggjaldakerfi og sagði með ólíkindum að sjá heilbrigðisráðherra og fjármálaráðherra vísa ábyrgðinni hvor á annan, án þess að nokkur væri tilbúinn að axla ábyrgð á stöðunni.