Bíósýningar, goðafræði og gamlir jeppar á frímerkjum

Íslandspóstur gefur út þrjár frímerkjaraðir á morgun. Myndefnin á þeirri fyrstu tengjast bíósýningum og kvikmyndagerð á Íslandi. Smáörk kemur út í samnorrænu röðinni Goðafræði og er þetta er í annað sinn sem Norðurlöndin gefa út frímerki sameiginlega um þetta efni.

Loks eru gefin út tvö hefti þar sem myndefnið er fyrstu jepparnir sem fluttir voru hingað til lands.

Fyrsta kvikmyndahúsið hér á landi, Fjalakötturinn, sem einnig var þekkt meðal þjóðarinnar sem Reykjavíkur Biograftheater eða einfaldlega Bíó, var opnað með pomp og prakt 2. nóvember 1906.

Norðurlanda-frímerkin svonefndu, sem Norðurlöndin gefa sameiginlega út, tengjast norrænni goðafræði og eru í þremur hlutum sem koma út á tveggja ára fresti. Fyrsti hlutinn nefndist „Heimur goðanna" og kom út 2004. Þemað í öðrum hlutanum eru „Náttúruvættir".

Fyrsti fjórhjóladrifni bíllinn sem kom til Íslands var þýskur herheppi af Tempo Vidal gerð. Í seinni heimsstyrjöldinni lét bandaríski herinn nokkra aðila smíða tilraunabíla til nota í hernaði. Þessir aðilar voru m.a. Willys verksmiðjurnar. Bíllinn skyldi vera léttur og fjórhjóladrifinn. 1942 komu fyrstu Willys jepparnir hingað á vegum hersins en árið 1946 veitti ríkisstjórnin innflutningsleyfi á jeppum til almennra borgara.