Útboðið mistókst ekki

Lánasýsla ríkisins harmar það sem hún kallar neikvæðan fréttaflutning um nýlegt útboð ríkisbréfa og hafnar öllum fullyrðingum um að það hafi mistekist. Í tilkynningu frá Lánasýslunni segir að valið hafi verið að taka engum tilboðum að þessu sinni þrátt fyrir að hafa móttekið tilboð að fjárhæð 3.700 m.k.

Ástæðurnar voru þrjár. Tilboð frá aðalmiðlurum voru lítið eitt hærri en búist var við og hærri en tilboð á eftirmarkaði þegar útboð fór fram. Þetta stafar líklega af óvissu á markaði vegna nýbirtra og að sumu leiti villandi skýrslna um íslenskt efnahagslíf. Lánasýslan telur að skýrslur þessar hafi valdið fjárfestum erfiðleikum við að mynda skoðun á efnahagslífinu og að viðbrögð fjárfesta við umræddum skýrslum séu tímabundin. Lánasýslan telur því að tilboð í framtíðinni muni endurspegla betur ástand efnahagslífsins.

Í öðru lagi var afgangur ríkisfjármála á síðasta ári 3,8% af vergri landsframleiðslu og það hefur leitt til góðrar stöðu ríkissjóðs. Af þeim sökum er ekki þörf á útgáfu ríkisbréfa til að fjármagna ríkissjóð.

Í þriðja lagi kemur fram í Ársáætlun Lánasýslu ríkisins fyrir árið 2006 að innlend lánsfjárþörf sé engin og stefnt að því að ekkert álag verði á innlendum lánamarkað. Þetta verður gert með því gefa út ríkisbréf fyrir 20 ma.kr. og ráðstafað söluandvirðinu til að forinnleysa ríkisbréf í flokki RIKB 070209 fyrir 10 ma.kr. og til að lækka stöðu ríkisvíxla um 10 ma.kr.

Útboðin eru því fyrst og fremst haldin til að byggja upp markflokk ríkisbréfaflokksins RIKB 10 0317 á eftirmarkaði en ekki til að fjármagna ríkissjóð.

Lánasýslan tekur einnig fram að Staðreyndin er að íslenska ríkið fær mjög góðar einkunnir hjá lánshæfismatsfyrirtækjunum Moody's, Standard and Poor's og Fitch, sem eru á bilinu AA+ til AAA fyrir innlendar langtímaskuldbindingar.