Skiptar skoðanir innan Samfylkingarinnar um flugvöll

Skiptar skoðanir eru um það innan þingflokks Samfylkingarinnar hvort Reykjavíkurflugvöllur eigi að víkja úr Vatnsmýrinni, en skoðanirnar grundvallast þó ekki á því hvort um er að ræða landsbyggðarþingmenn eða þingmenn á höfuðborgarsvæðinu. Þetta kom fram umræðum um staðsetningu sjúkraflugvéla í fyrirspurnartíma á Alþingi í dag.

Magnús Þór Hafsteinsson, þingmaður Frjálslynda flokksins, spurði í dag heilbrigðisráðherra hvort ráðuneytið hefði eftirlit með því að sjúkraflugvélar væru alltaf á þeim stað sem samningar við flugrekendur gerðu ráð fyrir og hvort refsiákvæði væri að finna í samningunum. Ástæða spurninganna var að sögn Magnúsar atvik sem komið hafa upp síðustu mánuði, í Vestmannaeyjum og á Vestfjörðum, þar sem sjúkraflugvélar hafa ekki verið fyrir hendi eða verið of seinar þegar á hefur reynt.

Ráðherra sagði að ráðuneytið hefði beint því til heilbrigðisstofnana sem nýttu sér sjúkraflug að tilkynna það ef flugrekendur stæðu ekki við gerða samninga. Þá hefði sjúkraflutningamaður verið ráðinn til að hafa eftirlit með samningunum. Þá væri fyrir hendi heimild til að fella niður greiðslur til flugrekenda vegna þess sem vanefnt gæti verið. Enn fremur mætti segja upp samningum án fyrirvara vegna stórfelldra eða ítrekaðra vanefnda.

Magnús lýsti því yfir við umræðurnar að mikilvægt væri að flugvöllurinn yrði áfram í Vatnsmýrinni út frá sjónarhóli heilbrigðisþjónustunnar þannig að sem stystan tíma tæki að koma fólki úr sjúkraflugi til aðalheilbrigðisstofnana landsins. Undir þetta tók heilbrigðisráðherra.

Björgvin Sigurðsson, þingmaður Samfylkingarinnar í Suðurkjördæmi, vildi hins vegar flugvöllinn burt og sagði landið í Vatnsmýrinni of dýrmætt fyrir hann. Hins vegar væri mikilvægt að finna vellinum annan stað.

Flokssystir hans, Ásta Ragnheiður Jóhannesdóttir, þingmaður Reykvíkinga, var hins vegar á öndverðum meiði og sagði landinu vel varið undir flugvöll í miðri borg.