Rafgeymar splundruðust yfir all stórt svæði

Ílát sem notað er til flutnings á notuðum rafgeymum valt af bíl frá Flytjanda í gærkvöldi. Við það splundruðust rafgeymar sem voru í ílátinu yfir all stórt svæði. Óhappið varð um klukkan sjö í gærkvöldi við rætur Öxnadalsheiðar. Hreinsunarstarf gekk vel en fimmtán manns frá Brunavörnum Skagafjarðar og Björgunarsveitinni í Varmahlíð stóðu að hreinsuninni fram undir miðnætti í gær. Svo virðist sem ílátið hafi ekki verið tryggilega fest á bílnum og í fréttatilkynningu sem Eimskip, eigandi Flytjanda, sendi frá sér verðu málið yfirfarið og tryggt að úrbætur verði gerðar á slíkum festingum í framtíðinni.

"Óhapp í Norðurárdal í Skagafirði.

Það óhapp varð í gærkvöldi, þriðjudag 21. mars, um kl. 19, að ílát sem notað er til flutnings á notuðum rafgeymum valt af bíl frá Flytjanda, vöruflutningafyrirtæki Eimskips, við vestanverðar rætur Öxnadalsheiðar, innst í Norðurárdal. Við þetta splundruðust rafgeymar sem í kerinu voru yfir allstórt svæði.

Menn frá Brunavörnum Skagafjarðar voru kallaðir út ásamt björgunarsveitarmönnum úr Björgunarsveitinni í Varmahlíð, samtals um 15 manns. Þeir hreinsuðu svæðið eins og unnt var miðað við aðstæður. Fenginn var bíll með ílát frá Gámaþjónustu Ó.K. á Sauðárkróki. Fylgst verður með staðnum í samráði við fulltrúa Heilbrigðiseftrilits Skagafjarðar og svæðið hreinsað betur ef þörf krefur.

Óhappið virðist mega rekja til þess að ekki var nægilega tryggilega gengið frá farminum á bílnum. Það mál verður yfirfarið af hálfu Eimskips og tryggt að bætt verði úr í framtíðinni.

Eimskip vill koma á framfæri þakklæti til allra hlutaðeigandi fyrir aðstoðina. Félagið mun fylgja því eftir að enginn þeirra beri kostnað af aðstoðinni og að komið verði í veg fyrir mengun af þessu óhappi eins og kostur er.

Um Eimskip

Eimskip býður heildarþjónustu í flutningum. Þjónustunet Eimskips er sett saman af 54 skrifstofum félagsins í Evrópu, N-Ameríku, S-Ameríku og Asíu, um 30 skipum og 15 frystigeymslum í Evrópu, N-Ameríku og Asíu, ásamt ýmsum dótturfélögum og samstarfsaðilum.

Um Avion Group

Avion Group starfrækir 85 starfsstöðvar víðs vegar um heiminn og starfsmenn félagsins eru á fimmta þúsund. Félagið býður viðskiptavinum sínum traustar, hraðvirkar og hagkvæmar lausnir í flutningum, með samhentri starfsemi sem á enga sína líka."