Einn og hálfur milljarður til uppbyggingar fyrir geðfatlaða

Einum og hálfum milljarði króna verður varið á næstu fjórum árum til uppbyggingar í búsetu- og stoðþjónustumálum geðfatlaðra. Þeir sem eru án húsnæðis og umönnunar munu njóta forgangs ásamt þeim sem búa hjá ættingjum og þeim sem eru tilbúnir til útskritfar af geðdeild.

Félagsmálaráðherra og heilbrigðisráðherra kynntu í dag áfangaskýrslu um þjónustu við geðfatlaðra. Þar er meðal annars greint frá könnun sem gerð var meðal geðfatlaðra á síðasta ári á eðli og umfangi búsetu og stoðþjónustu við þennan hóp.

Alls bárust upplýsingar um nærri fimm hundruð einstaklinga og af þeim hópi óskuðu 215 eftir breytingum á búsetuhögum, en flestir þeirra búa á suðvesturhorninu. Áætlað er að 159 af þeim hópi þarfnist svokallaðrar sértækrar búsetuþjónustu, þar sem þörf er á viðveru starfsfólks.

Til þess að verða við óskum þess hóps ætla yfirvöld að verja einum og hálfum milljarði á árunum 2006 til 2010, en það fé verður notað til kaupa og byggingar á húsnæði fyrir geðfatlaða og í dagþjónsutu eins og endurhæfingu og verndaða vinnu. Milljarður kemur af sölufé Síman en sá hálfi sem upp á vantar er sóttur í Framkvæmdasjóð fatlaðra.

Uppbyggingin hefst þegar á þessu ári en ljóst er að forgangsraða þarf í hópnum.

Jón Kristjánsson félagsmálaráðherra segir að þeir sem búi hjá ættingjum eða séu reiðubúnir til útskriftar af geðdeild njóti forgangs að hans mati ásamt þeim sem ekki hafi húsnæði og njóti ekki umönnunar.

Verkefnisstjórn sem vinna mun að uppbyggingunni hefur þegar hafið störf en formaður hennar, Dagný Jónsdóttir þingkona, leggur áherslu á samvinnu með notendum þjónustunnar og hagsmunasamtökum geðfatlaðra. Hún segir að til standi að funda með þeim á föstudag og þeirra hugmyndir verði teknar inn í vinnu verkefnisstjórnarinnar.