Afli íslenskra fiskiskipa dregst saman

Afli íslenskra fiskiskipa hefur dregist saman um tæplega fjörutíu prósent á yfirstandandi fiskveiðiári miðað við síðasta ár.

Þetta kemur fram í fréttatilkynningu frá Fiskistofu í tilefni þess að í lok febrúar var fiskveiðiárið hálfnað. Heildaraflinn var þá kominn í tæplega fimm hundruð og áttatíu þúsund tonn en á sama tíma á síðastliðnu fiskveiðiári var aflinn ríflega níu hundruð og sextíu þúsund tonn, eða um fjörutíu prósentum meiri. Þar vegur þyngst minni afli uppsjávartegunda en afli loðnu og kolmunna á þessu fiskveiðiári er rúmlega þrjú hundruð og sjötíu þúsund tonnum minni en hann var á sama tíma í fyrra. Botnfiskaflinn er líka minni núna, og rækjuveiðar á Íslandsmiðum virðast hafa lagst af, að minnsta kosti í bili.

Heildaraflinn í febrúar síðastliðnum var um tvö hundruð og fjórtán þúsund tonn samkvæmt bráðabirgðatölum Fiskistofu. Það er tæplega áttatíu og sjö þúsund tonnum minni afli en í febrúar í fyrra og er skýringuna að finna í minni loðnuafla.

Fiskveiðiárið er frá fyrsta september til 31. ágúst. Heildaraflamarkið fyrir þetta ár er tæplega þrjú hundruð níutíu og fimm þúsund tonn og voru eftirstöðvar í lok febrúar hundrað áttatíu og sjö þúsund tonn. Það eru talsvert minni eftirstöðvar en á sama tíma í fyrra, en þess ber að geta að aflamarkið á síðasta fiskveiðiári var um þrjátíu og fimm þúsund tonnum hærra en í ár.