Hlutverk Íbúðalánasjóðs endurskoðað

Halldór Ásgrímsson forsætisráðherra hefur beðið um að endurskoðun á hlutverki Íbúðalánasjóðs verði hraðað en horft er til þess að breyta honum í heildsölubanka. Halldór fól nýjum félagsmálaráðherra að fylgja málinu eftir þegar breytingar urðu á ríkisstjórninni.

Árni Magnússon fyrrverandi félagsmálaráðherra var fylgjandi því að skoða þessa leið en vildi fara hægt í sakirnar. Athygli vakti að Halldór Ásgrímsson segðist í morgun hafa bryddað upp á málinu við ráðherraskiptin og beðið nýjan félagsmálaráðherra að flýta málinu. Hann sagði jafnframt að að þrátt fyrir að sjóðurinn yrði heildsölubanki yrðu áfram tryggð hagstæð lán fyrir alla.

Halldór segir að undanfarna daga hafi verið viðræður um þessi mál og það sé aukin samstaða meðal fjármálastofnana að ná samkomulagi um málið.

Ríkisendurskoðun vinnur nú að fjárhagsútekt á Íbúðalánasjóði en beðið var um úttektina í kjölfar umræðu um stöðu sjóðsins eftir að húsnæðismarkaðurinn breyttist með tilkomu bankanna, gagnrýni á áhættustýringu sjóðsins og lánveitingar til bankanna.

Halldór segir að nauðsynlegt sé að eyða óvissu um stöðu íbúðalána. Hann neitar því hinsvegar að neinn ágreiningur hafi verið milli hans og Árna Magnússonar um hvernig standa bæri að málum. Engin stefnubreyting sé við brottför hans úr ráðuneytinu.