Hátt í 22 milljónir lítra af áfengi seldir í fyrra

Áfengissala hér á landi jókst um tæp 7% milli áranna 2004 og 2005. Um 5% aukningu er að ræða á hvern íbúa 15 ára og eldri sem er með því mesta sem verið hefur á síðustu árum. Seldir voru hátt í 22 milljón lítrar af áfengi á síðasta ári samanborið við rúma 20 árið áður.

Þetta kemur fram í Hagtíðindum en þar segir einnig að sala á léttu víni aukist stöðugt hér á landi og þá sérstaklega síðustu þrjú árin. Sala á sterku víni jókst einnig í fyrra frá árinu á undan en það er ólíkt þróuninni árin þar á undan.