Viðbótargreiðslur vegna Kárahnjúkavirkjunar 5-6 milljarðar kr.

Viðbótargreiðslur Landsvirkjunar vegna ófyrirséðra útgjalda við Kárahnjúkavirkjun nema nú fimm til sex milljörðum króna. Auk þess má búast við háum fjárkröfum vegna aukins borkostnaðar. Engu að síður telur Landsvirkjun að heildarkostnaður verði innan þess ramma sem lagt var upp með, sem gerði ráð fyrir tíu til ellefu milljarða króna ófyrirséðum kostnaði. Langstærsti hluti þess viðbótarkostnaðar, sem þegar hefur verið gerður upp, féll til vegna stíflugrunns Kárahnjúkastíflu. Undir stíflustæðinu reyndust sprungur stærri og jarðvegur gljúpari en búist var við. Nýtt áhættumat gangvart jarðskjálftum kallaði einnig á meiri styrkingar og þéttingar. Þessi fimm til sex milljarða króna aukakostnaður er talsvert meira en ný Vaðlaheiðargöng eru talin kosta. En fleiri aukaútgjöld bíða Landsvirkjunar, einkum vegna risaboranna, og segir Agnar Olsen, framkvæmdastjóri hjá Landsvirkjun, að slíkar kröfur séu í farvatninu. Framkvæmdir við Kárahnjúkavirkjun eru nú liðlega hálfnaðar. Stærsti óvissuþátturinn, og sá sem helst gæti seinkað verklokum, er borun jarðganganna. Risaborarnir þrír eru sem stendur hins vegar allir í góðu bergi og boruðu samtals 111 metra í gær. Bor eitt, sem hóf sitt verk ofan stöðvarhúss í Fljótsdal, hefur gengið best og er nú búinn með 12,6 kílómetra en á eftir 4,3. Bor tvö hefur gengið verst en hann er þó kominn 8,6 kílómetra en á eftir fjóra þangað til honum verður snúið við til að bora göng í átt að Eyjabökkum. Bor þrjú boraði fyrst átta kílómetra í átt að Hálslóni en var svo snúið við fyrir áramót og borar hann nú í hina áttina til móts við bor númer tvö. Hann er búinn með 9,5 kílómetra en á eftir sex kílómetra. Samtals eru því eftir um fjórtán kílómetrar sem þurfa að klárast fyrir haustið ef virkjunin á að komast í gang á tilsettum tíma.