Viðræðurnar fóru út um þúfur

Fátt virðist geta komið í veg fyrir að öryggisráð Sameinuðu þjóðanna beiti Írana refsiaðgerðum vegna áforma þeirra um að auðga úran. Samningafundur utanríkisráðherra helstu ríkja Evrópusambandsins með erindreka Írana fór út um þúfur í morgun.

Mánuður er síðan stjórn Alþjóðakjarnorkumálastofnunarinnar afréð á fundi sínum að reyna að ná samkomulagi við klerkastjórnina í Íran um kjarnorkuáætlun hennar áður en endanleg ákvörðun yrði tekin um hvort málinu yrði vísað til öryggisráðs Sameinuðu þjóðanna. Íranar vilja sjálfir auðga úran en það vill þorri alþjóðasamfélagsins ekki þar sem óttast er að úranið verði þá auðgað svo ríkulega að það megi nota í kjarnavopn. Rússar hafa boðist til að auðga úranið en það tilboð hafa Íranar ekki viljað þiggja.

Í morgun funduðu utanríkisráðherrar Frakklands, Þýskalands og Bretlands með írönskum erindrekum, að frumkvæði þeirra síðarnefndu, en eins og svo oft áður skilaði sá fundur engu. Frank-Walter Steinmeier sagði í samtali við blaðamenn eftir fundinn að tíminn til sáttaumleitana væri að renna út. Á mánudaginn hittist stjórn Alþjóðakjarnorkumálastofnunarinnar og ákveður næstu skref. Sátt ríkir innan stjórnarinnar um að vísa málinu til öryggisráðsins en ekki er víst til hvaða ráða það mun grípa.

Sergei Lavrov, utanríkisráðherra Rússlands, benti á í samtali við fréttamenn í dag að engar umræður um deiluna hefðu átt sér stað í ráðinu og þess vegna væri ekki sjálfgefið að refsiaðgerðir gegn Írönum yrðu samþykktar. Rússar eiga mikilla viðskiptahagsmuna að gæta í Íran og því gætu þeir beitt neitunarvaldi til að koma í veg fyrir að Íranar yrðu beittir efnahagsþvingunum.