Segist hafa gert ráðstafanir vegna öryggis starfsmanna sinna

Fyrirtækið Enex, sem Jón Þór Ólafsson starfaði hjá, segist hafa gert viðeigandi ráðstafanir til að tryggja öryggi starfsmanna sinna í El Salvador. Forsvarsmenn þess vísa fréttum, þar sem gefið er í skyn að þeir hafi hunsað ráðleggingar um slíkt, á bug.

Ófremdarástand ríkir í El Salvador en morðtíðni þar er með því hæsta sem gerist í heiminum. Að því er fram kemur í vefútgáfu dóminíska dagblaðsins Dominican Today voru 414 myrtir í landinu fyrsta einn og hálfan mánuð þessa ár. Á síðasta ári voru 55,5 af hverjum hundrað þúsund íbúum El Salvador myrtir, hérlendis er hlutfallið 0,5 af hverjum hundrað þúsund. Morð eru með öðrum orðum eitthundrað sinnum algengari í El Salvador en á Íslandi.

Bíatrís Sarkó Sveinsson, ræðismaður Íslands í landinu, sagði í samtali við NFS í dag að á sínum tíma hefði hún mælt með því við Enex, fyrirtækið sem Jón Þór Ólafsson starfaði hjá, að ráðinn yrði fyrir hann lífvörður. Nú laust fyrir fréttir sendi Lárus Elíasson, framkvæmdastjóri Enex, frá sér yfirlýsingu þar sem kemur að gerðar hafi verið ráðstafanir til að verða við ábendingum ræðismannsins um vopnaða gæslu öryggisvarða á virkjanasvæðinu í Berlin, sem er skammt frá höfuðborginni.

Auk þess kveðst Enex hafa komið því til leiðar að starfsmannaíbúðir fyrirtækisins séu á svæðum sem talin eru mjög örugg. Að öðru leyti segist Enex leggja áherslu á að fylgja sömu öryggiskröfum og önnur erlend fyrirtæki með svipaða starfsemi í landinu.

Í yfirlýsingunni segir svo orðrétt: "Enex er umhugað um öryggi starfsmanna sinna. Fréttir þar sem beinlínis er gefið í skyn að forráðamenn Enex hafi hunsað ráðleggingar um að ráða lífvörð til að gæta Íslendinga í El Salvador eiga sér enga stoð í veruleikanum." Að sögn alþjóðadeildar ríkislögreglustjóra er ekkert nýtt að frétta af rannsókn málsins en íslensk yfirvöld fylgjast grannt með framvindunni.