Líklega ekki um fuglaflensu að ræða í Finnlandi

Heilbrigðisyfirvöld í Finnlandi greindu frá því í gær að niðurstöður úr sýnum úr hræjum nokkurra svana sem fundust þar í landi bendi ekki til að fuglarnir hafi drepist úr nokkurri gerð fuglaflensu. Fuglaflensan greindist þó í þremur nýjum löndum um helgina: Frakklandi, Indlandi og Íran. Heilbrigðisstarfsmenn í suðurhluta Indlands aflífuðu þúsundir kjúklinga á laugardag og verður alls hálf milljón fugla aflífuð. Þá hefur enn eitt tilfelli veirunnar fundist á Ítalíu.