Tveir fundust á lífi

Tveir fundust á lífi í morgun í rústum þorpsins Guinsaugon á Filippseyjum, eftir aurskriðurnar á föstudag. Vinna er hafin við að grafa upp barnaskóla þorpsins, þar sem 250 börn urðu undir tíu metra þykkri eðjunni. Útilokað þykir að nokkurt þeirra sé á lífi.

Björgunarmenn hafa gefist upp fyrir þeirri staðreynd að leit þeirra beinist nú að því að finna lík, en ekki eftirlifendur. Almenningur biður fyrir sálum þeirra er fórust í skriðunni sem þurrkaði út heilt þorp.

Bæði almenningur og ráðamenn velta nú fyrir sér hvernig hægt sé að koma í veg fyrir að svona harmleikur endurtaki sig. Sjónum er beint að skógarhöggi sem losar upp jarðveginn í fjallshlíðum, með þeim afleiðingum að hann getur runnið af stað í miklum rigningum. Þessar voru ástæður mannskæðra aurskriða á Filippseyjum síðla árs 2003.

Á þessu svæði hinsvegar, hefur ekki verið mikið skógarhögg, og hallast menn því að því að þarna sé um að ræða samspil óvenjumikilla rigninga og jafnvel lítils jarðskjálfta sem gæti hafa hrint aurskriðunni af stað.