Lítil von með að finna fólk á lífi

Björgunarsveitir eygja litla von til að finna fleiri á lífi eftir aurskriðurnar í Guinsaugon á Filippseyjum. Aðstæður til leitar eru afar erfiðar og enn er hætta á fleiri aurskriðum.

Nú er talið að um 1800 manns hafi farist í skriðunum, sem nánast gleyptu heilt þorp. Hjálpargögn og fleiri björgunarmenn berast nú í stríðum straumum á svæðið og enn er leitað. Lögð er áhersla á að finna þá sem lifðu hamfarirnar af, en vonin um að fleiri finnist á lífi dvínar hratt.

Það rignir enn, sem gerir hjálparstarfið ákaflega erfitt og áhættusamt. Björgunarmenn þurfa margir að vaða aurinn upp að mitti, og yfir vofir sú hætta að fleiri aurskriður fari af stað. Í héraðinu hafa ellefu þorp verið rýmd. Áhersla er lögð á að grafa upp barnaskóla, en óstaðfestar fregnir herma að ættingjar 250 barna og starfsfólks hafa fengið SMS skilaboð úr rústum skólans.