Kalk og D-vítamín minnka ekki líkur á beinþynningu

Kalk og D-vítamín minnka ekki líkur á beinþynningu hjá eldri konum eins og lengi hefur verið haldið fram. Þetta eru niðurstöður stærstu rannsóknar sem gerð hefur verið á þessu sviði.

Niðurstöðurnar benda ótvírætt til að aukaskammtar af kalki og D-vítamínum hjá konum á miðjum aldri og upp úr hafi nær ekkert að segja.

Rannsóknin náði til 36 þúsund kvenna og tók sjö ár. Konunum var skipt í tvo hópa, sem ýmist fengu eitt gramm af kalki og 400 milligrömm af D-vítamini á dag í sjö ár eða bara lyfleysu. Í ljós kom að hópurinn sem fékk lyfleysu þjáðist ekki frekar af beinþynningu eftir árin sjö, heldur en hópurinn sem hafði fengið aukaskammta af kalki og D-vítamíni á hverjum degi á meðan á rannsókninni stóð.

Niðurstöðurnar þykja merkilegar því að önnur hver kona í Bandaríkjunum þjáist af beinþynningu einhvern tíma á lífsleiðinni og hingað til hefur kalk- og D-vítamín inntaka verið talin ein helsta leiðin til að koma í veg fyrir þennan kvilla. Engu að síður telja rannsakendur ekki rétt fyrir konur á miðjum aldri að hætta að taka þessi steinefni og vítamín, en þær verði að gera sér grein fyrir að það sé ekki endilega nóg. Aðrir þættir séu ekki síður mikilvægir og þá ekki síst regluleg hreyfing.