Óskaði eftir aðstoð lögreglu við að fá endurgreitt frá eiturlyfjasala

Fólk óskar eftir aðstoð lögreglunnar í hinum ýmsu og oft ótrúlegustu málum en ósk Þjóðverja nokkurs á dögunum slær líklega flestar beiðnir um lögregluaðstoð út. Maðurinn keypti sér 200 grömm af maríjúana af ónefndum eiturlyfjasala, en þegar hann prófaði varninginn skömmu eftir viðskiptin var hann langt í frá ánægður með gæði efnisins. Hann fór því aftur á fund á sölumannsins til að krefjast endurgreiðslu, en hafði ekki erindi sem erfiði. Maðurinn strunsaði þá á næstu lögreglustöð, skellti öllu grasinu á borðið og krafðist þess að lögreglan aðstoðaði sig við að fá endurgreitt á þeim forsendum að varan væri gjörsamlega ónothæf. Maðurinn bíður nú dóms fyrir brot á þýsku fíknefnalöggjöfinni.