Íslandsbanki heitir nú Glitnir

Íslandsbanki, sem slíkur, er ekki lengur til. Glitnir er hið nýja nafn bankans. Forstjórinn segir að Íslandsbanki hafi verið eitt besta nafn sem hægt var að nota, en hið nýja henti betur fyrir starfsemina í dag.

Um þúsund starfsmönnum, íslenskum, norskum, frá Bretlandi og Lúxembúrg, hafði verið stefnt í Háskólabíó klukkan 6 í gær til að kynna þeim breytingar á starfseminni. Og eftir töluverða sýningu var leyndarmálinu ljóstrað upp.

Nafni bankans hefur verið breytt úr Íslandsbanka í Glitnir, en bankinn á reyndar fjármögnunarfyrirtæki með sama nafni. Nú verður hins vegar öll starfsemin undir þessu nýja nafni. Forstjóri bankans segir gamla nafnið þó líklega eitt hið besta sem hægt væri að hugsa sér, á Íslandi að minnsta kosti.