Spítali greiði bætur fyrir heilsutjón

Landspítalinn var í dag dæmdur til að greiða fyrrum starfsmanni sínum tæpar sjö milljónir króna í bætur vegna líkamstjóns sem starfsmaðurinn varð fyrir í starfi sínu.

Starfsmaðurinn, hjúkrunarkona sem vann á speglunardeild spítalans á Landakoti og síðar í Fossvogi, skaðaðist af því að vinna með glútaraldehýð. Sannað þykir að það geti verið skaðlegt heilsu fólks og hafði verið varað við notkun þess í vísindatímaritum áður en konan hóf störf á sjúkrahúsinu. Þrátt fyrir það fékk hún ekki leiðbeiningar um hvernig ætti að fara með efnið. Tjón hennar af völdum efnisins er metið til fimmtán prósenta örorku og spítalinn fundinn bótaskyldur.