Ekki riðið út frá Glaðheimum ef skipulagi verður breytt

Formaður hestamannafélagsins Gusts segir ljóst að ekki verði riðið út frá félagssvæði þess í Glaðheimum í framtíðinni ef ný tillaga bæjaryfirvalda að deiliskipulagi á reitum nærri svæðinu verður samþykkt. Formaðurinn er þó vongóður um að tekið verði tillit til athugasemda félagsins.

Samfylkingin í Kópavogi efndi í fyrrakvöld til opins fundar þar sem Þóra Ásgeirsdóttir, formaður Gusts, greindi frá stöðu mála í tengslum við Gust. Bæjaryfirvöld hafa nú auglýst tillögu að nýju deiliskipulagi á þremur reitum, Hnoðraholti, Smalaholti og Rjúpnahæð, þar sem byggja á upp íbúðabyggð. Þessu er Gustsfólk mótfallið þar sem það segir þrengt enn frekar að sér ásamt því sem reiðleiðir verði bæði færðar til og jafnvel teknar alveg.

Þóra segir alvarlegt fyrir hestamannafélagið ef tillögurnar ná fram að ganga athugasemdalaust. Þá verði ekki riðið meira út í Glaðheimum. Á hinn bóginn hafi hún enga trú á því að svo verði. Gustsfólk treysti því að bæjaryfirvöld sýni þeim skilning og vilji hafa það áfram á staðnum. Gustur hafi samning í Glaðheimum til 2038 og að sjálfsögðu sé ætlunin að vera þar út samningstímann.

Við þetta bætist að hestamannafélagið tekst nú á við verktaka um lóðir í Glaðheimum, svokallaða uppkaupsmenn, en þeir hafa þegar keypt um 30 prósent hesthúsa á svæðinu. Þóra segir aðspurð að sú barátta geri félaginu einnig erfitt fyrir. Það sé alltaf erfitt þegar miklir peningar séu annars vegar. Hins vegar veiki þetta ekki Gustara því þeir séu frægir fyrir annað en að láta sundra sér. Þeir muni standa saman og koma sterkari út úr þessu.

Forsvarsmenn Gusts hafa fundað með bæjaryfirvöldum vegna málsins og er tillögu frá bæjarstjóra umað lausn málsinsað væntainnan tveggja vikna.