Mjólka kærir undirboð

Nýja mjólkurvörufyrirtækið Mjólka hefur kært Osta- og smjörsöluna til Samkeppnisráðs fyrir undirboð og óeðlilega viðskiptahætti. Ólafur Magnússon, framkvæmdastjóri Mjólku, segir Osta- og smjörsöluna nota ráðandi markaðsstöðu til að reyna að bola Mjólku út af markaðinum.

Mjólka er eina afurðastöðin í mjólkuriðnaði sem starfar utan greiðslumarkaðskerfis landbúnaðarins og nýtur því engra styrkja frá hinu opinbera. Fyrirtækið rekur eigið mjólkurbú og kaupir einnig mjólk af bændum. Ólafur segist hafa haft spurnir af því að Osta- og smjörsalan hafi heimsótt bændur sem hafa haft hug á að leggja inn mjólk hjá Mjólku og hótað þeim að þeir missi réttindi sem þeir hafi safnað upp hjá fyrirtækinu ef þeir skipti við Mjólku.