Sádi-Arabía gengur ekki til liðs við Bandaríkjamenn

Leiðtogar Sádi-Arabíu ætla ekki að ganga til liðs við Bandaríkjamenn um að neita Palestínumönnum um utanaðkomandi fjárhagsaðstoð nú þegar Hamas-samtökin hafa tekið við völdum í heimastjórn Palestínu. Sádi-Arabía er því annað landið sem neitar þessari umleitan Bandaríkjamanna en Egyptar hafa viljað halda áfram fjárhagsaðstoð við Palestínumenn. Condoleezu Rice, utanríkisráðherra Bandaríkjanna, hefur því ekkert orðið ágengt í þessum efnum í ferð sinni um miðausturlönd. Sádi-Arabía mun því halda áfram að styðja Palestínu um tólf milljarða íslenskra króna árlega. Bandaríkin og Evrópusambandið segja Hamas-samtökin vera hryðjuverkasamtök sem beri ekki að hjálpa.