Efnahagshorfurnar neikvæðar

Matsfyrirtækið Standard og Poor´s hefur breytt mati á efnahagshorfum á Íslandi úr stöðugum í neikvæðar. Forstöðumaður Hagfræðistofnunar segir þetta staðfestingu á því að ríkisstjórnin verði að ganga í lið með Seðlabankanum í baráttunni við verðbólgudrauginn. Matsfyrirtækið Standard og Poor´s er eitt af þremur helstu óháðu matsfyrirtækjum heims, en hin eru Fitch og Moody's. Í síðasta mati fyrirtækisins á almennum efnahagshorfum á Íslandi voru þær sagðar stöðugar, en í matinu sem birtist í dag hefur þetta breyst og horfurnar nú neikvæðar.Tryggvi Þór Herbertsson segir þetta undirstrika að sú þensla sem ríki í efnahagslífinu auki líkurnar á harðri lendingu. Hins vegar breyti þetta engu um lánskjör.

Þannig staðfestir Standard og Poor´s lánshæfi Íbúðalánasjóðs í matinu í dag. En þrátt fyrir að það sé engin ástæða til að örvænta að mati Tryggva, er ljóst að verðbólgan hér á landi er allt of há og það er stærsta ástæðan fyrir því að matinu á efnahagshorfum hefur verið breytt. Tryggvi segir alveg ljóst að stjórnvöld gætu beitt sér harðar í baráttunni gegn verðbólgunni en gert hafi verið. Ef það takist að koma böndum á þensluástandið muni Ísland aftur fá stöðugt mat frá fyrirtækinu.