Viðræðum lauk án árangurs

Viðræðum Japana og Norður-Kóreumanna, um að reyna að koma á nýju stjórnmálasambandi, lauk í morgun án árangurs.

Japönsk stjórnvöld sögðust í gær ekki ætla að koma aftur á stjórnmálasambandi við Norður-Kóreu ef ekki finnist lausn á kjarnorkudeilunni við þá og upplýsingar fáist um alla þá japönsku ríkisborgara sem Norður-Kóreumenn rændu fyrir rúmum þrjátíu árum.

Aðalfulltrúi Kóreumanna í viðræðunum sagði að þeim loknum að hann væri hvorki bjartsýnn né vonsvikinn. Báðir aðilar hefðu kynnst sjónarhorni hinna betur undanfarna daga, og um leið komist að því að það beri mikið í milli.

Þetta voru fyrstu fundir æðstu fulltrúa ríkjanna í þrjú ár og hafa báðir aðilar lýst yfir áhuga á að hittast að nýju.