Er ekkert lélegur í fótbolta

"Ég ætlaði ekki að taka þetta verkefni að mér því ég hef merkilegt nokk verið duglegur við að segja nei við auglýsingum. Svo fannst syni mínum, sem er átta ára, það vera hræðilegt að sleppa þessu þannig að ég gat ekki sagt nei. Hann uppskar líka treyju Heiðars Helgusonar sem allir landsliðsmennirnir árituðu," segir leikarinn Ari Matthíasson, sem fer á kostum í nýrri auglýsingu Icelandair.

Í auglýsingunni fer Ari með hlutverk fótboltaáhugamanns sem heima í stofu lætur sig dreyma um að hann sé ein af hetjunum sínum, sjálfum landsliðsmönnum Íslands í knattspyrnu. Óhætt er að fullyrða að auglýsingin hafi vakið mikla athygli enda er hún sýnd grimmt meðan á HM í knattspyrnu stendur.

Ari er einn af þekktari leikurum þjóðarinnar en hann starfar þó ekki sem slíkur í dag. Hann hóf störf sem framkvæmdastjóri hjá SÁÁ fyrir þremur mánuðum. "Ég reif mig upp úr leiklistinni og fór í MBA-nám við Háskólann í Reykjavík. Þetta er hefðbundin stjórnunarstaða hjá SÁÁ, fullt starf svo maður hleypur ekki mikið frá," segir Ari, sem er greinilega þegar kominn vel inn í málin og upplýsir blaðamann um ágæti þess starfs sem SÁÁ vinnur: "Við gerðum könnun um daginn þar sem þrjú þúsund svör fengust. Í ljós kom að 86 prósent svarenda þekktu einhvern sem á við áfengis- eða vímuefnavanda að stríða. Það er því ekki seinna vænna fyrir ríkið að hysja upp um sig brækurnar og endurnýja þjónustusamninginn við SÁÁ sem er runninn út. Annars er mikil hætta á því að meðferðin sem í boði er verði ekki jafn góð og örugg."

Icelandair-auglýsingin var tekin upp á æfingasvæði knattspyrnufélagsins QPR í London. Ari segir að það hafi verið mjög gaman að eyða heilum degi með landsliðsmönnunum. Hann viðurkennir líka fúslega að hann hafi ekki þurft að hafa allt of mikið fyrir leik sínum: "Já, þessi gæi er nokkuð nálægt mér. Maður hugsar stundum um það að ef aðrir hlutir hefðu ekki farið að glepja mann í menntaskóla væri maður kannski einn af þessum drengjum. Þá væri maður kannski með demantslokk í eyrunum," segir Ari hlæjandi.

Ari æfði fótbolta með KR á sínum yngri árum og situr nú í stjórn KR-sports. Ari er að lokum spurður hvort hann hafi virkilega getað eitthvað í fótbolta þegar hann var ungur. "Mér fannst það. Við skulum svo bara setja punktinn þar. Nei, nei, Ég var alla vega ekkert svo lélegur."