Brottrekinn forstjóri skili lúxusjeppanum

Hæstiréttur segir að Hreinn Jakobsson, fyrrverandi forstjóri Skýrr, hafi brotið trúnaðarskyldu gegn fyrirtækinu með því að ráða sig til keppinautarins Anza.

Hreini var fyrirvaralaust sagt upp starfi forstjóra hjá Skýrr 7. apríl á þessu ári. Þann 1. september var hann ráðinn forstjóri tölvu-þjónustufyrirtækisins Anza. Stjórnendur Skýrr töldu Hrein hafa brotið ákvæði ráðningarsamningsins um að ráða sig ekki til samkeppnisfyrirtækis næstu tvö árin og hættu að greiða honum laun sem áður hafði verið lofað að yrðu borguð út fyrir tólf mánaða uppsagnarfrest.

Hreinn var sömuleiðis beðinn að skila Porche Chaeynne jeppa fyrirtækisins sem hann hefði annars átt að fá að halda út uppsagnarfrestinn.

Hreinn taldi að Skýrr ætti að borga honum launin áfram þar sem ósannað væri að hann hefði brotið ákvæði ráðningarsamningsins um trúnaðarskyldu. Hann sagðist mundu halda jeppanum sem tryggingu fyrir laununum.

Stjórnendur Skýrr sögðu augljóst að Hreinn hefði haft trúnaðarskyldur sínar að engu með því að ráða sig sem forstjóra hjá keppinauti Skýrr þótt meir en helmingur væri eftir af uppsagnarfrestinum. Ákvæði ráðningarsamningsins um að fyrirtækið legði forstjóra til bíl gæti ekki náð til þess að Skýrr ætti að útvega forstjóra allt annars fyrirtækis bíl. Með því að kyrrsetja Porche-jeppann væri Hreinn að taka lögin í eigin hendur. Við það væri ekki hægt að una.

Eftir árangurslausa sáttafundi í haust höfðaði Skýrr mál gegn Hreini til að ná af honum jeppanum.

Í úrskurði Héraðsdóms Reykjaness, sem Hæstiréttur hefur nú staðfest, segir að starfsmaður á uppsagnarfresti beri sömu trúnaðarskyldur við vinnuveitanda eins og ef hann væri í starfi. Hann megi ekkert aðhafast sem geti skaðað atvinnurekandann. Hreinn hafi ráðið sig til starfa hjá Anza sem sé í harðri samkeppni við Skýrr og þar með brotið trúnaðarskylduna við Skýrr og gegn ráðningarsamningnum. Hann ætti því engan rétt til að halda jeppanum.

„Það er mjög afgerandi í dómnum að með því að ráða sig sem forstjóra annars fyrirtækis þá hafi Hreinn brugðist trúnaðarskyldum sínum við Skýrr," segir Bjarni Birgisson, stjórnarformaður Skýrr, aðspurður um niðurstöðuna.

Ekki náðist í Hrein Jakobsson.