Gætum minnkað eldsneytisneyslu um helming á tíu árum

Þorkell Helgason orkumálastjóri segir að Íslendingar gætu minnkað eldsneytisneyslu ökutækja um helming á tíu árum með því að breyta samsetningu bílaflotans á Íslandi. Þetta kom fram í máli hans á aðalfundi Orkumálastofnunar í dag.

Hann telur skattalegar aðgerðir geta hjálpað til við að halda stærð bíla í skefjum en einnig þyrfti að koma til samstillt átak þjóðarinnar um að nýta sér sparneytna bíla. Hann nefnir í þessu samhengi svokallaða tvinnbíla sem þegar eru til reiðu og komast af með nær helmingi minna bensín en sambærilegir bílar.

Þorkell spáir hækkandi orkuverði, jafnt á raforku og olíuafurðum. Þetta muni koma sér vel fyrir orkufyrirtæki en augljóslega verði dýrara að reka bíl eða gera út skip. Hann segir orkufyrirtæki Íslendinga muni hagnast mikið í framtíðinni því sé afar mikilvægt að stjórnvöld móti skýra stefnu í orkumálum. Eins og er sé tiltölulega jöfn eignaraðild þjóðarinnar að orkufyrirtækjunum en í framtíðinni gætu þau komist í einkaeigu þó það sé ekki fyrirætlun stjórnvalda. Þá þurfi að vera til skýr orkumálastefna til þess að arðurinn af þessari auðlind dreifist jafnt til þjóðarinnar eins og vera ber.