Svartolía lak úr Wilson Muuga í dag

Svartolía lak í dag úr kýpverska flutningaskipinu Wilson Muuga sem strandaði við Hvalsnes á þriðjudag. Eftir því sem fram kemur í tilkynningu frá Umhverfisstofnun er olíubrákin kílómetri á lengd og 200 metra breið en hún er ekki samfelld.

Starfsmenn á vegum Umhverfisstofnunar fóru um borð í skipið í dag með þyrlu Landhelgisgæslunnar og sáu þá að svartolía var farin að leka úr skipinu og lá taumur í átt til lands. Er um að ræða svartolíu úr rifnum botntönkum skipsins.

Meðal verkefna á skipsstað var að setja einstreymisloka á öndunarop sem liggur frá botngeymunum upp á yfirborð. Þegar því verki var lokið dró umtalsvert úr lekanum og þegar farið var frá borði var ástandið þannig að flekkurinn hafði slitnað frá skipinu.

Fulltrúar frá heilbrigðiseftirliti Suðurnesja og umhverfisnefnd Sandgerðis skoðuðu fjörur við strandstað og í næsta nágrenni. Við fjörukönnun sást enginn olíublautur fugl en vegna mikils fuglalífs er talið sennilegt að fugl muni lenda í þessari olíu.

Með flóði og auknu brimi samfara vaxandi vindi nú með kvöldinu eykst hreinsimáttur náttúrunnar og því munu náttúruöflin sjá um að brjóta olíuna niður í nótt.

Vont veður hefur verið á strandstaðnum nánast frá því að skipið strandaði en nú er útlit fyrir að það versta sé yfirstaðið. Að sögn Umhverfisstofnunar situr skipið stöðugt á fjörunni en hefur þó færst eilítið nær landi síðustu nótt og situr því hærra. Niðurstaðan er sú hvað skipið varðar að allar líkur eru á því það situr og muni sitja stöðugt.

Áætlað er að fljúga yfir svæðið strax í birtingu á morgun til könnunar á olíuflekk og senda mann í skipið þannig að hægt sé að kíkja í lestar og geyma. Gengnar verða fjörur og fylgst verður með skipinu af og til. Í framhaldi af þessu verður staðan endurmetin.