200 Kúrdar handteknir í mótmælaaðgerðum í Tyrklandi

Um tvö hundruð Kúrdar voru handteknir í mótmælaaðgerðum í borgunum Adana og Batman í Tyrklandi í dag. Mótmælin upphófust í gær þegar sjö ár voru liðin frá handtöku kúrdíska andspyrnuleiðtogans Abdullah Ocalan. Mótmælendur hentu grjóti og múrsteinum að lögreglumönnum sem vörðust með kylfum og skjöldum. Lögreglan réðist meðal annars til inngöngu í byggingu sem hýsir höfuðstöðvar stjórnmálahreyfingar Kúrda í Adana þar sem töluverður fjöldi fólks var handtekinn. Ocalan var dæmdur til dauða eftir að hann var handtekinn árið 1999 fyrir að standa fyrir skæruárásum Kúrda í suðausturhluta Tyrklands í sjálfstæðisbaráttu þeirra sem staðið hefur yfir frá 1984. Dómurinn var seinna mildaður í lífstíðarfangelsi sem leiðtoginn afplánar nú á fangaeyju undan ströndum Tyrklands, en þess má geta að Ocalan er eini fanginn í eynni.