Almenn ánægja með uppsagnir

Almenn ánægja virðist vera meðal leikara Þjóðleikhússins með uppsagnir í þeirra röðum, jafnt hjá þeim sem misstu vinnuna og þeim sem sluppu með skrekkinn. Sumir þeirra viðurkenna þó að aðferð leikhússtjóra hafi skapað vanlíðan. Þeir þrír leikarar sem sagt var upp samningum við eru Arnbjörg Hlíf Valsdóttir, Sólveig Arnarsdóttir og Þórunn Lárusdóttir. Sólveig sagðist í hádegisfréttum Bylgjunnar vera lukkuleg með uppsögnina. Þórunn Lárusdóttir sagði í samtali við fréttastofu Stöðvar 2 að síðastliðin helgi hefði verið einkennileg en þjóðleikhússtjóri tilkynnti fyrir helgi að ætlunin væri að segja upp tíu samingum við leikara og eðlilegasta aðferðin væri að taka þá sem stystan starfsaldur hefðu. Þórunn Lárusdóttir sagði leikhússtjóra hafa staðið ágætlega að þessu og hún myndi vinna aftur í Þjóðleikhúsinu undir Tinnu Gunnlaugsdóttur. Leikarar sem sögðu upp sjálfviljugir og Stöð 2 ræddi við í dag töldu líka að allt þetta ferli í lagi en enginn vildi tjá sig undir nafni. Reyndar gáfu sumir þá skýringu að þeir vildu ekki rugga bátnum, eins og það var orðað. Rúnar Freyr Gíslason, formaður félags leikara við Þjóðleikhúsið, sagðist í samtali við Stöð 2 í dag ekki hafa fengið neinar kvartanir frá sínum félagsmönnum vegna uppsagnanna. Reyndar var ljóst áður en þjóðleikhússtjóri tilkynnti leikurum að til stæði að fækka um tug að einhverjir væru þegar búnir að láta vita að þeir ætluðu ekki að starfa áfram við stofnunina. Tinna Gunnlaugsdóttir sagði í fréttum í gær að hún hefði fyrir helgi vísvitandi skapað óvissu, jafnvel hættuástand, meðal starfsmanna sinna til að fá viðbrögð við ákvörðun sinni. Hún neitaði því hins vegar að með því hefði hún sett þrýsting á þá starfsmenn sem síðan sögðu upp að fyrra bragði. Ásta Bjarnadóttir, lektor á sviði mannauðsstjórnunar við viðskiptadeild Háskólans í Reykjavík, sagði í samtali við Stöð 2 í dag að þessi aðferð væri þekkt. Stórfyrirtæki erlendis notuðu hana gjarnan þegar fækka þyrfti fólki og kæmust þar með hjá uppsögnum. Venjan væri sú að einhver ágóði fælist í því fyrir viðkomandi starfsmann að segja upp. Slíku virðist að vísu ekki hafa verið til að dreifa í þessu tilfelli en aðferðin væri engu að síður sú sama. Almennt þyki þetta mildari aðferð en að fara beint í uppsagnir.