Fjarstýra ratsjárstöðvum árið 2007

Ákveðið hefur verið að ratsjárstöðvum Ratsjárstofnunar verði fjarstýrt frá ratsjárstöðinni á Miðnesheiði frá og með haustinu 2007, eftir því sem fram kemur í frétt á vefsíðu Víkurfrétta. Stefnt er að því að auka smám saman sjálfvirkni í rekstri ratsjárstöðvanna á Bolafjalli, Gunnólfsvíkurfjalli og á Stokksnesi og verður þeim öllum fjarstýrt frá ratsjárstöðinni á Miðnesheiði haustið 2007. Hingað til hafa ratsjástöðvarnar verið mannaðar sólarhringsvöktum en með breytingunni verður fækkað í starfsliði Ratsjárstofnunar. Alls starfa nú 79 manns hjá Ratsjárstofnun en þar af eru 32 starfsmenn á sólarhringsvöktum í ratsjárstöðvunum fjórum. Ekki liggur endanlega fyrir hversu mörgum verður sagt upp störfum við skipulagsbreytingarnar en það ræðst meðal annars af endanlegri útfærslu kerfisins.