Sumarhúsalóðir Landgræðslunnar

Landgræðslan leigir út lóðir í sinni eigu til sumarbústaðabyggðar. Um er að ræða í kring um 45 lóðir sem hver er fimm til tíu hektarar að stærð. "Landgræðslan á heilmikið land sem hefur verið afhent út af uppblæstri. Fólk hefur mikinn áhuga á því að fá land til að græða upp og svo hafa margir áhuga á því að byggja," segir Ásgeir Jónsson, sviðstjóri landupplýsingasviðs hjá Landgræðslunni, en stofnunin hefur komið til móts við þetta með því að skipuleggja reiti sem leigðir eru út til fólks þar sem má byggja. Nokkrar lóðir voru leigðar út árið 1997 og nú er verið að skipuleggja enn fleiri, auk þess sem verið er að setja inn á skipulag lóðir sem leigðar voru út fyrir tuttugu til þrjátíu árum. "Við höfum haft þann háttinn á að menn borga litla leigu fyrir skikann á meðan bara er uppgræðsla á honum, en um leið og fólk fer að byggja hækkar leigan upp í það sem við höldum að sé markaðsvirði. Þetta er gert svo Landgræðslan lendi ekki í samkeppni við einkaaðila." Aðspurður um tekjur Landgræðslunnar af leigunni segir Ásgeir að þetta sé ekki hugsað sem tekjumöguleiki fyrir stofnunina. Þvert á móti sé þetta aðferð til að græða upp land og fá fólk til að taka þátt í því. Hann neitar því þó ekki að ef margir fari að byggja þá hafist af þessu þó nokkrar tekjur. Meirihluti stjórnar Orkuveitu Reykjavíkur var fyrr í sumar mjög gagnrýnd af minnihluta Sjálfstæðismanna í stjórninni fyrir að ætla að standa að byggingu sumarbúsaðabyggðar við Úlfljótsvatn. Þorbjörg Helga Vigfúsdóttir, stjórnarmaður í OR, segir að ekki sé alveg um sambærileg mál að ræða og tekur fram að hún þekki ekki mál Landgræðslunnar. "Orkuveitan er hluti í fyrirtæki sem ætlar sér að búa til og reka heilt samfélag með sex hundruð húsum en ekki bara leigja lóðir til einstaklinga." Þorbjörg bætir við að sama grunnhugmynd hljóti að ganga yfir alla og að hún sé almennt mjög á móti því að ríkisfyrirtæki, eins og fyrirtæki í eigu sveitarfélaga, séu í samkeppni við einkaaðila.