Fjármálaeftirlitið gerir opinbert

Fjármálaeftirlitið mun framvegis birta opinberlega niðurstöður mála sem eftirlitið hefur tekið til skoðunar, og greina frá hvort tiltekin mál, sem eru í opinberri umræðu, séu til athugunar eða ekki. Þetta verður gert samkvæmt lögum sem tóku gildi um mánaðamótin. Fjármálaeftirlitið hefur í framhaldi af þeim mótað stefnu um upplýsingagjöf og segir þar meðal annars að komi tiltekið málefni til umfjöllunar á opinberum vettvangi, og spurningar vakna um hvort þörf sé athugunar Fjármálaeftirlitsins, er upplýst um hvort málið sé til athugunar eða hvort ákveðið hafi verið að taka málið upp eða ekki. Eftirlitið mun hins vegar að jafnaði ekki rökstyðja ákvarðanir sínar og almennt ekki greina frá málum fyrr en niðurstöður liggja fyrir, hafi málið ekki orðið opinbert fyrr. Þó verða slíkar upplýisngar veittar á heimasíðu eftirlitsins ef vitneskja um málefni varða hagsmuni viðskiptamanna eða almennings. Varðandi mál um verðbréfaviðskipti getur eftirlitið frestað eða dregið úr upplýsingagjöf ef fyrirfram má ætla að upplýsingarnar spilli rannsóknarhagsmunum. Eins ef niðurstaða af athugun eftirlitsins er sú að vísa beri málinu til Ríkislögreglustjóra. Þetta er mikil breyting frá því sem verið hefur en hins vegar mun Fjármálaeftirlitið ekki taka þátt í opinberri umræðu um niðurstöður mála sem birtar hafa verið, nema að brýn ástæða sé til þess að mati eftirlitsins.