Sprengjuleitaræfing í Sundahöfn

Sú staða gæti komið upp að sprengja fyndist um borð í skemmtiferðarskipi í íslenskri landhelgi. Landhelgisgæslan og Siglingastofnun blésu nýlega til æfingar þar sem viðbrögð við slíkri hættu voru æfð. Æfingin fór fram í Sundahöfn, en sprengju hafði verið komið fyrir um borð í skemmtiferðaskipi þar sem fjögur hundruð farþegar voru um borð. Sprengju var komið fyrir í skipinu af sprengjusérfræðingi Landhelgisgæslunnar og fann áhöfn skipsins sprengjuna eftir leit. Þá var kallað eftir aðstoð gæslunnar og var allur búnaður, ásamt sprengjusérfræðingum látinn síga niður í skipið. Æfingin miðaðist við að skipið væri statt út á rúmsjó. Að sögn Sigurðar Ásgrímssonar sprengjusérfræðings hjá Landhelgisgæslunni gekk æfingin vel. Hann segir viðbrögð áhafnarinnar hafa verið góð, en sérstakur sprengjuleitarhópur er í áhöfn skipsins. Sigurður segir að æfingin hafi verið mikilvæg fyrir Landhelgisgæsluna því nauðsynlegt sé að búa sig undir að slíkt geti gerst um borð í skipi í íslenskri landhelgi, en á bilinu 40 til 50 skemmtiferðarskip koma til landsins á hverju sumri.