Reiðilestur við Háskóla Íslands

Sigursteinn Másson, formaður Geðhjálpar hélt í hádeginu reiðilestur við Háskóla Íslands. Hann telur Háskóla Íslands ekki hafa hugað að geðheilbrigði stúdenta sinna, auk þess sem svo ómanneskjulega sé víða tekið á móti nýnemum að fjölmargir brotni undan álaginu og veikist hreinlega á geði. Reiðilesturinn er haldinn á vegum jafnréttis- og öryggisnefndar Stúdentaráðs Háskóla Íslands og það er ýmislegt sem Sigursteinn hefur við Háskólann að athuga þegar kemur að geðheilbrigðismálum. Hann sagðist hafa kosið að nefna erindið reiðilestur þar sem full ástæða væri til að messa yfir Háskólayfirvöldum og ýmsum aðilum innan Háskóla Íslands vegna þess að í skólanum væru líklega um tvö þúsund nemendur sem ættu við geðrraskanir að stríða og engin geðheilbrigðisáætlun væri til innan skólans eða viðbragðaáætlun þegar upp koma vandamál. Annað atriði sem Sigursteinn telur Háskólann þurfa að gera mikla bragarbót á, er hvernig farið er emð nýnema. Sigursteinn telur ýmsar deildir háskólans taka með eindæmum illa á móti þeim ungmennum sem komi beint úr framhaldsskólunum og séu misvel í stakk búin að takast á við nýtt og oft á tíðum ómanneskjulegra umhverfi. Hann segir að umhverfið sé harkalegt samkeppnisumhverfi gagnvart nýnemum sem eru að koma úr framhaldsskólum og þeim er oft mætt af mikilli hörku, bæði þurfa þau að fara í gegnum síu og margir upplifa mikla niðurlægingu við upphaf námsferils síns og geðraskanir fylgja oft í kjölfarið. Þannig er Háskólinn ábyrgur gagnvart geðheilbrigðisvanda í Háskólanum og ýtir beinlínis undir geðsjúkdóma.