Aðeins opið um helgar

"Þetta var sameiginleg ákvörðun enda umferð fólks í Viðey á virkum dögum mjög lítil," segir Jóhannes Stefánsson, eigandi Múlakaffis, en það fyrirtæki mun reka veitingasölu í Viðeyjarstofu um helgar í sumar. Er það talsverð breyting frá því sem verið hefur undanfarin ár þegar alltaf hefur verið hægt að ganga að veitingum vísum hvenær sumars sem er. Rekstaraðilar Viðeyjarferjunnar eru meðal þeirra sem gagnrýnt hafa þessa ákvörðun Borgarminjavarðar, Guðný Gerðar Gunnarsdóttur, en skammt er síðan fram fór útboð vegna ferjusiglinga til eyjarinnar og kom ekki fram þar að veitingarekstur yrði aðeins um helgar. Slíkt setur eðlilega skorður við þann fjölda fólks sem áhuga hefur að skreppa stund yfir sundið og hafa allnokkrir erlendir ferðamenn sem komið hafa að lokuðum dyrum Viðeyjarstofu lýst yfir furðu sinni. Sem kunnugt er hefur þeim er sækja eyjuna heim fækkað um tæpan helming á tíu árum og er þetta útspil ólíklegt til að auka straum ferðamanna til þessarar náttúruperlu. Guðný Gerður Gunnarsdóttir svaraði ekki skilaboðum blaðamanns.