Á að gefa skýrslu

Landhelgisgæslan þarf að skila skýrslu vegna mengunarvarna í hvert skipti sem hún dælir olíu milli varðskipanna í Reykjavíkurhöfn. Bergur Þorleifsson, hafnarstjóri í Reykjavík, segir að það hafi ekki verið gert en Landhelgisgæslan verði að fara að reglum eins og aðrir. "Við höfum aldrei orðið varir við að olíu hafi verið dælt á milli skipa þannig að við urðum jafn hissa og aðrir þegar þetta kom í fréttum. Það getur ekki verið mikið um að dælt sé milli varðskipanna því að við höfum menn á vakt og þeir hafa ekki orðið varir við þetta," segir Bergur. Georg Kr. Lárusson, forstjóri Landhelgisgæslunnar, sagði nýlega að olíu væri stundum dælt milli varðskipanna þegar stofnunin ætti ekki fyrir olíu. Greiða þarf 218 krónur á tonn í vörugjald þegar olíu er dælt í land. Gæslan þarf ekki að greiða þetta gjald þar sem olíunni er dælt milli skipa og kemur aldrei í land.