75 ára afmæli Skógræktarfélagsins

Skógræktarfélag Íslands fagnaði 75 ára afmæli sínu í Þingvallasveit í dag. Afmælishátíðin var haldin í Vinaskógi í Kárastaðalandi þar sem 75 birkitré voru gróðursett til hátíðabrigða. Skógræktarfélag Íslands var stofnað á Alþingishátíðinni á Þingvöllum árið 1930. Á Þingvöllum í dag var veðrið ekki alveg eins og skógræktarmenn í hátíðarskapi höfðu óskað sér og fór dagskráin því að mestu leyti fram undir stóru tjaldi sem var reist á svæðinu. Ýmsir ráðamenn sem tengjast félaginu, hafa starfað í skógræktarfélögum eða veitt þeim liðveislu var boðið. Þeirra á meðal var Guðni Ágústsson landbúnaðarráðherra. Hann flutti ávarp þar sem sagði m.a. að gárungar og húmoristar hafi búið það til að ráðherrann hafi einhvernt tíma sagt að þar sem þrjú tré komi saman, þar sé skógur. „Auðvitað er það ekki rétt því það var verkefni Vigdísar Finnbogadóttur sem ég tel að hafi verið sú manneskja sem á nýjan leik hleypti krafti í skógrækt á Íslandi þegar hún varð forseti fyrir 25 árum,“ sagði Guðni Svo skundaði hersingin í Vinaskóg en hugmyndin að honum varð til á 60 ára afmæli félagins. Vigdís Finnbogadóttir tók upp þann sið í forsetatíð sinn að bjóða erlendum þjóðhöfðingjum að gróðursetja tré í Vinaskógi og þar hafa 19 erlendir þjóðhöfðingjar plantað trjám. Vigdís gróðursetti eitt tré í dag og sjá mátti á handtökum hennar að þar var alvön manneskja á ferð. Auk hennar kom Guðni og Björn Bjarnason, dómsmálaráðherra og formaður Þingvallanefndar, að gróðursetningunni. Fyrir röskum hundrað árum hófst skipuleg skógrækt á Íslandi og margt hefur áunnist. Skógar þekja nú um 1,3 prósent landsins og munu ef til vill tvöfaldast á næstu hundrað árum, ef miðað er við þann fjölda plantna sem nú er gróðursettur árlega.