Tökur á mynd Eastwoods að hefjast

Tökur á stórmynd Clints Eastwoods, Flags of Our Fathers, hefjast á fimmtudag. Nokkrar af Hollywood-stjörnum myndarinnar lentu í Keflavík í dag. Það er nett Hoolywood-stemmning á Suðurnesjum þessa dagana enda stutt í að tökur hefjist á stórmyndinni Flags of Our Fathers í Sandvík á Reykjanesi. Það var erill í Leifsstöð í dag þegar nokkrar kvikmyndastjörnur sem munu leika í myndinni komu með flugi frá San Francisco. Fyrstur í linsu Stöðvar 2 var þekktur aukaleikari í Hollywood, Barry Pepper, sem m.a. hefur leikið í The Green Mile, Saving Private Ryan og fleiri myndum. Aðspurður sagðist hann hlakka til dvalarinnar hér á landi. Hann hefði heyrt ýmislegt um Ísland og að svartir sandarnir hér væru eins og sandarnir á Iwo Jima. Þeir komu fleiri út úr Leifsstöð, misþekktir, þar á meðal nokkrir áhættuleikarar. Hins vegar var einn mjög þekktur, Jamnie Bell, en hann dansaði sig eftirminnilega inn í hjörtu fólks í myndinni Billy Elliot. Hann var hálffalinn inni í amerískri hettupeysu. Aðspurður um hlutverk sitt í myndinni sagði að Bell hann lék strák að nafni Ralph sem væri sjóliði í þriðju herdeild. Spurður frekar um myndina sagði Bell að hún yrði rétt út frá sagnfræðilegu sjónarmiði og hann væri viss um að leikstjórinn, Clint Eastwood, vildi halda sig eins vel við atburðina eins og þeir voru og hann gæti. Inntur eftir því hvort hann teldi hlutverk sitt stórt sagði Bell að svo væri og svo gilti einnig um aðra. Um væri að ræða stærstu stund í hersögu Bandaríkjanna og mikilvægt væri að gera myndina, sérstaklega á þeim tímum sem við lifðum.  Tökur munu fara fram fimmtudag, föstudag og laugardag og á milli 500 og 600 manns munu verða í Sandvík innan um sprengjur og stríðstól. Shoot Week One er titill sem fór í loftið hjá aðstandendum myndarinnar í gær. Það þýðir bara eitt, Clint Eastwood er að koma en von var á honum til Keflavíkur um kvöldmatarleytið.