Ákvörðun Kjaradóms ábyrgðarleysi og skapar þrýsting

Gylfi Arnbjörnsson, framkvæmdastjóri Alþýðusambandsins, segir að ákvörðun Kjaradóms um launahækkun æðstu embættismanna sé tekin af algeru ábyrgðarleysi og skapi þrýsting á vinnumarkaði. Ef ákvörðunin fái að standa grafi það undan getu og vilja verkalýðshreyfingarinnar til að stuðla að langtímasamningum.

Gylfi Arnbjörnsson segir að á sama tíma og almennt launafólk hafi fengið launahækkanir á þessu ári upp á fimm til sex prósent, sé kjaradómur að ákveðja ríflega ellefu prósenta hækkun til alþingismanna. Þetta sé algerlega órökstudd hækkun og það sé alvarlegt að almenningur og félagasamtök þurfi yfirleitt að óska eftir upplýsingum um ákvörðun kjaradóms og rökstuðningi, í stað þess að kjaradómur og kjaranefnd upplýsi almenning að fyrra bragði eins og eðlilegt verði að teljast. Kjaradómur sé ekki hluti af dómsvaldinu, heldur hluti af stjórnsýslunni.

Í hádegisviðtalinu á NFS í gær sagði Gylfi að það vekti athygli að kjaradómur velji sér ólíka viðmiðunarhópa hverju sinni. Þeir forystumenn þjóðarinnar sem teldu að það samrýmdist ekki þeirri stefnu ASÍ að launabreytingar væru af þessum takti njóti þeirra sjálfir. Hvernig ætli þeir að nálgast það ef taka eigi sameiginlega á efnahagsvanda hér.

Gylfi segir að hvort sem mönnum líki betur eða ver, skapi ákvörðun kjaradóms viðmiðun fyrir aðra á vinnumarkaðnum og hafi áhrif á trúverðugleika stjórnmálanna. Ef þessi ákvörðun fái að standa, grafi það bæði undan getu og áhuga verkalýðshreyfingarinnar til að stuðla að langtímalausnum á vinnumarkaðnum. Áhrifin séu því afgerandi.

Annaðhvort sé ein þjóð hér á landi sem deili kjörum eða þá að hún sé tví- eða margskipt og þá verði allir að hugsa um sinn hag. Hann spyr hvort það sé ekki það sem gerist núna, hvort allir muni ekki banka upp á hjá sinum atvinnurekanda og krefjast betri launa. Hann telji því að vegna þessarar ákvörðunar Kjaradóms skapist talsverður þrýstingur og ákvörðunin sé mikið ábyrgðarleysi.