Tólf unglingar voru handteknir í miklum kynþáttaóeirðum í Sidney í Ástralíu í gær. Þúsundir hvítra unglinga söfnuðust saman í strandhverfum borgarinnar og gerðu aðsúg að hópi ungmenna af arabískum uppruna og létu öllum illum látum. Nokkrir slösuðust alvarlega í átökun og eins voru nokkrir bílar eyðilagðir. Ólætin má rekja til þess að hópur innflytjenda réðst á tvo strandverði í Sidney fyrir viku. Eftir það skipulagði stór hópur hvítra ungmenna árásir á hóp innflytjenda. Lögregla komst að því að uppþotin væru í aðsigi og því var fjölmennt lið lögreglu mætt á staðinn í gærkvöldi. Þrátt fyrir það átti hún fullt í fangi með ungmennin reiðu, sem mörg hver voru vopnuð hafnaboltakylfum og öðrum bareflum.
Erlent
