Stuðningur og samúð minnisstæð Flateyringum

Stuðningur og samúð íslensku þjóðarinnar eru Flateyringum minnistæð nú þegar tíu ár eru liðin frá því að snjóflóðið féll á Flateyri þar sem 20 manns létu lífið.

Frú Vigdís Finnbogadóttir verður sérstakur gestur á minningardagskrá sem haldin verður á Flateyri í kvöld. Jóhanna Guðrún Kristjánsdóttir er ein þeirra sem sér um undibúning minningarhátíðarinnar. Hún segir Flateyringa, ekki síst þá sem hafi átt um sárt að binda, minnast framgöngu Vigdísar þegar flóðið reið yfir bæinn. Vigdís hafi nú óskað eftir því að eyða deginum í dg með Flateyringum.

Jóhanna Guðrún segir Flateyringa nota hvert tækifæri sem gefist til að koma á framfæri innilegu þakklæti til allra þeirra sem stutt hafi þá fyrir 10 árum. Þeir sú margir, nánast öll íslenska þjóðin sem hafi lagt fram fé í söfnunarsjóðinn Samhugur í verki.

Minningardagskráin verður haldin í íþróttahúsinu á Flateyri klukkan átta í kvöld. Þá verður einnig haldin bænastund í Neskirkju í Reykjavík og hefst hún á sama tíma.